Sérdeild Hamraskóla var stofnuð haustið 1996. Deildin er ein þriggja sérdeilda í grunnskólum í Reykjavík fyrir nemendur með einhverfu. Hinar tvær eru í Fellaskóla og Langholtsskóla.

Deildin í Hamraskóla var stofnuð með það að markmiði að sinna þörfum nemenda á aldrinum 6-16 ára sem hafa fengið greiningu á einhverfurófi. Deildin hefur rými fyrir 6 nemendur hverju sinni. Núverandi húsnæði er í tveimur björtum kennslustofum á jarðhæð skólans. Deildin starfar samkvæmt deildarnámskrá  sem er hluti af skólanámskrá skólans.

Allir nemendur í sérdeild Hamraskóla eru skráðir í almenna bekki og er stefnt að því að nemendur deildarinnar taki eins mikinn þátt í almennu bekkjar og skólastarfi og kostur er.

Grundvöllur alls starfs í Hamrasetri byggist á hugmyndafræði TEACCH (Treatment and education of autistic and related communication handicapped children). Meginhugmyndafræði TEACCH  er að  leggja áherslu  á sérþarfir og menningu fólks með einhverfu og leitast við að skipuleggja og aðlaga umhverfið  til að auðvelda fólki  með einhverfu að lifa og starfa í heimi þeirra sem eru ekki með einhverfu.

Í TEACCH   er gengið út frá því að flest börn með einhverfu skilji betur það sem þau sjá en það sem þau heyra. Þar er m.a. lögð áhersla á skipulagða kennslu og kennsluumhverfi, fyrirsjáanleika og yfirsýn yfir væntingar með hjálp sjónræns stuðnings, sem hentar hverjum og einum  (Mesibow, Shea og Schopler, 2004). Hvað varðar boðskipti hefur verið lögð áhersla á að sjónrænn stuðningur hjálpi börnum með einhverfu að lesa í umhverfið. Að bæta myndrænum stuðningi af ýmsum toga við talað mál hefur gefið góða raun við kennslu þessara barna og hjálpað þeim við flókin viðfangsefni. Leitast er við að hafa   sjónrænt skipulag bæði á tíma og verkefnavinnu. Gott sjónrænt skipulag eykur öryggi og sjálfstraust nemenda, gerir þeim kleift bæði að kynnast nýjum athöfnum og fá aukið þor til að framkvæma þær.

Allir nemendur deildarinnar hafa einstaklingsnámskrá sem unnin er af kennurum  í samráði við foreldra þeirra. Haft er til hliðsjónar námskrá þess aldurshóps sem nemandinn tilheyrir. Þeir nemendur sem hafa getu til að fylgja námsefni síns bekkjar taka sömu próf og aðrir nemendur og er námsmatið niðurstaðan úr þeim prófum.

Þegar um er að ræða barn með sérþarfir er gott samstarf og upplýsingamiðlun á milli heimilis og skóla algjör forsenda þess að vel takist til með nám barnsins.  Einnig er  mjög mikilvægt að kennarar og annað fagfólk beri saman bækur sínar og starfi saman. Reglulegir teymisfundir eru mikilvægir þar sem upplýsingum er miðlað og byggð upp samvinna milli heimilis og ólíkra fagaðila. Aðeins þannig næst markviss árangur í starfi. Fundir vegna hvers barns eru tvisvar sinnum á önn og jafnvel oftar ef þörf krefur. Bæði foreldrar og kennarar geta beðið um fund.

Heimild

Mesibow, G.B., Shea,V. & Schopler, E. (2004). The Teacch  approach to autistic spectrum disorders. Chapel Hill: Springer.